Экспэрымэнт з першай групай навучэнцаў аказаўся паспяховым, са студзеня курсы базавай польскай мовы пашырацца.

pixabay.com/Public Domain/CC0

 

Ад сярэдзіны студзеня каля 30 чалавек будуць вывучаць польскую мову на бясплатных курсах, якія адчыніў Беларускі дом у Варшаве. Хто праходзіць на гэтыя курсы? Што ў вывучэнні польскай мовы даецца найскладаней? Як запісацца на заняткі? Гэтыя пытанні мы задаем арганізатарам курсаў – супрацоўнікам Беларускага дому Ларысе Караленцы і Ўладзімеру Кобецу.

14 студзеня пачнецца другі сэмэстар заняткаў польскай мовы, арганізаваных Беларускім домам у Варшаве. Колькасць удзельнікаў курсаў расце. У дадатак да першай групы з 12 чалавек, якая вывучае польскую мову з кастрычніка, заняткі пачне другая група колькасцю ў 20 чалавек. Запісацца на курсы можна, выслаўшы мэйл на адрас Беларускага дому ў Варшаве (belhouse.consulate@gmail.com), альбо патэлефанаваўшы на нумар, які можна знайсці на сайце арганізацыі.

Моўныя курсы створаныя для тых, хто прыехаў жыць ці працаваць у Польшчу, але практычна не размаўляе па-польску – тлумачыць сустаршыня Беларускага дому Ўладзімер Кобец. Такіх людзей даволі шмат – гэта рабочыя й прадпрымальнікі, якія толькі пачынаюць сваё жыццё за мяжой. Гэта хатнія гаспадыні, а таксама людзі, якія працуюць разам з такімі ж мігрантамі й таму маюць вельмі мала кантактаў з мясцовымі жыхарамі. На курсы прыходзяць і асобы старэйшага веку, якім вывучыць замежную мову складаней, чым маладым.

Уладзімер Кобец Фото: radyjo.net

 

Уладзімер Кобец: Гэта курсы базавага ўзроўню – для тых, што прыехаў у Польшчу й практычна не валодае польскай мовай. Зразумела, што ўдзельнікі курсаў разумеюць польскую мову. Вялікая частка з іх мае Карты паляка, проста ім не хапае практыкі. У асноўным гэта маладыя людзі, якія пераехалі ў Польшчу на сталую альбо часовую працу. Некаторыя нават пераехалі сем’ямі. Акрамя беларусаў на курсы ходзяць украінцы.

Заняткі вельмі патрэбныя тым, хто хоча знайсці сабе лепшую працу і інтэгравацца ў грамадзтва – кажа Ўладзімер Кобец.

Уладзімер Кобец: Мова патрэбная ня толькі для таго, каб набыць у краме прадукты, але й каб знайсці лепшую працу, развіваць стасункі з палякамі. Людзі пачынаюць з нуля, каб хуткімі тэмпамі асвоіць польскую мову.

Самаму малодшаму ўдзельніку заняткаў – 20 гадоў, а самаму старэйшаму – за 60, кажа арганізатарка курсаў Ларыса Караленка. Заняткі праходзяць у выходныя. А вядзе іх прафэсійная настаўніца, якія доўгія гады выкладала польскую мову замежнікам.

Ларыса Караленка. Фота, прадстаўленае гераіняй

 

Ларыса Караленка: Нашая настаўніца мае вялікі досвед выкладання польскай мовы іншаземцам. Яна мае сваю ўласную мэтодыку, якая спалучае практыку й тэорыю, тлумачыць правілы на жыццёвых прыкладах.

Самае галоўнае ў вывучэнні польскай мовы, як і любой замежнай – гэта пераадолець сябе й не саромецца размаўляць.

Ларыса Караленка: Каб пераадолець моўны бар’ер, людзі павінны пачаць размаўляць. Гэта асноўны момант, таму што можна ўсё разумець, але губляцца ў сытуацыях, калі трэба гаварыць самому. Таксама нашыя студэнты кажуць, то ім патрэбна вывучыць граматыку, каб правільна ўжываць тыя ці іншыя словы й выразы. Таму мы задумваемся над дадатковымі курсамі, дзе акцэнт будзе рабіцца на пісанне.

Арганізатары курсаў былі прыемна здзіўленыя высокімі вынікамі дыктоўкі, якую навучэнцы напісалі пасля заканчэння першага сэмэстру. З новага паўгоддзя працаваць на курсах пачне яшчэ адна настаўніца, якая раней выкладала польскую мову ў Беларусі.

Заняткі абсалютна бясплатныя – падкрэслівае Ўладзімер Кобец. Выкладчыкі вядуць іх на валянцёрскіх пачатках. У будучыні Беларускі дом плянуе набіраць слухачоў на курсы ня толькі базавага, але й сярэдняга ўзроўню.

Заняткі польскай мовы – гэта толькі адна з паслугаў, якую Беларускі дом прадстаўляе суайчыньнікам. У жніўні пачаў сваю працу «Кансулят» (Консульства) – праект па аказанні дапамогі беларускім грамадзянам, што знаходзяцца ў Польшчы. Кожны, хто апынуўся ў экстранай сытуацыі (напрыклад, патрапіў у дарожнае здарэнне ці мае праблемы з працадаўцам) можа патэлефанаваць на «гарачую лінію» і атрымаць юрыдычную дапамогу.

Падчас прыёмаў, якія адбываюцца тры разы на тыдзень, экспэрты Беларускага дому дапамагаюць з вырашэннем менш экстраных, але ня менш істотных пытанняў. Яны тлумачаць, як аформіць від на жыхарства, запісаць дзяцей у дзіцячы садок ці школу, дапамагаюць перакласці неабходныя дакумэнты альбо дапамагчы ў пошуках працы.

У 2018 годзе Беларускі дом збіраецца працягваць сваю культурную дзейнасць. Першае мерапрыемства адбудзецца ўжо 17 студзеня. Журналіст Зьміцер Кустоўскі прадставіць сваю кнігу «Прытулак», у якой ён сабраў досвед эмігранцкага жыцця.

Пра моўныя курсы, культурныя імпрэзы й юрыдычныя кансультацыі, якія праводзіць Беларускі дом у Варшаве, можна шырэй даведацца з сайту belaruskidom.eu альбо з профілю арганізацыі ў Фэйсбуку.

Аляксандар Папко, Польскае Радыё

 

Навіны ад Belprauda.org у Telegram. Падпісвайцеся на наш канал https://t.me/belprauda.

Recommend to friends
  • gplus
  • pinterest
Поддержать проект: