Беларускі дом прадставіў стратэгію сваёй дзейнасці на бліжэйшыя гады.

 

Foto: facebook.com/BelaruskiDom/

 

Арганізацыя плянуе працаваць на карысць набліжэння Беларусі да ЭЭ, а таксама дапамагаць беларусам замежжа ўтрымліваць повязі з Бацькаўшчынай.

6 год у польскай сталіцы дзейнічае грамадзкая ініцыятыва, створаная беларусамі, якія па палітычных прычынах былі вымушаныя з’ехаць з краіны. У Польшчы яны стварылі арганізацыю – задача якой дапамагаць іншым беларусам знайсці месца ў новай эмігранцкай рэчаіснасці, інтэгравацца ў польскае грамадзтва, пры гэтым не губляць сувязі з роднай краінай. Учора арганізацыя прадставіла стратэгію сваёй дзейнасці на бліжэйшыя 3 гады. Пра асноўныя моманты гэтай стратэгіі мы папрасілі распавесці старшыню арганізацыі Алеся Зарэмбюка.

Алесь Зарэмбюк: Мы зрабілі стратэгію на 2018-20 гг.. Яна палягае на тым, што мы будзем імкнуцца цягам гэтага часу развіваць беларускі дом у двух напрамках: праца па актывізацыі дыяспары ў Варшаве, і падтрымка грамадзянскай супольнасці ў Беларусі. Мы хочам засяродзіцца на тым, што адзінай альтэрнатывай для Беларусі з’яўляецца Эўрапейскі Звяз і беларусы павінны рухацца ў гэтым накірунку. Найлепшыя практыкі й досвед кіравання знаходзяцца менавіта тут.

Тры гады – гэта адпаведны тэрмін у сучасным свеце, які хутка змяняецца, дадаў сустаршыня Беларускага дому Ўладзімір Кобец.

Уладзімір Кобец: У такіх блізкіх краінах, як Беларусь і Польшча, цэнтры культуры павінны быць не на год ці два, а пастаянна. Нас звязвае агульная гісторыя ды будучыня. Я лічу, што Беларускі дом тут павінен быць увесь час. Час стратэгія на 3 гады, бо ўсё імкліва змяняецца, тым больш што наша стратэгія – гэта ня нешта застылае. У нас ёсць розныя блёкі, мы прыцягваем розных людзей. Мы імкнёмся адкрыць Беларускі дом як прастору для развіцця розных карысных для Беларусі й польска-беларускіх адносін ініцыятыў.

Чытайце па тэме:  Варшавский аэропорт хочет ввести режим тишины

У сваё стратэгіі Беларускі дом заявіў адну з задач, падтрымліваць інтарэс да Беларушчыны ў людзей, якія з’яжджаюць з краіны. Ці гэта рэальная задача, мы запыталіся ў мэдыя-кансультанта Аляксея Лявончыка.

Аляксей Лявончык: Захоўваецца, а ў некаторых абуджаецца. Шэраг маіх партнэраў знайшлі ў сабе сантымэнт да беларускай мовы акурат у эміграцыі. Дарэчы, я таксама знайшоў інтарэс да Беларушчыны, з’ехаўшы ў 1994 годзе з Беларусі. Я не скажу, што гэта дамінантная тэндэнцыя, але так часта адбываецца. Тым больш, што гэтую ідэалягічную прастору не запаўняе беларуская дзяржава, яна не прапануе прывабную мадэль: хто мы і да чаго імкнёмся. Людзі робяць гэта самі па сабе, адшукваюць сваю беларускую ідэнтычнасць за мяжой.

Многім Беларускі дом дапамагае ў падтрымцы іх беларускасці, кажа перакладніца Марыя Луцэвіч, якая жыве ў Польшчы. Беларускі дом стаў месцам у Польшчы, дзе можна сустрэцца з суайчыннікамі.

Марыя Луцэвіч: Ініцыятыва вельмі патрэбная. Беларусы павінны мець месца ў Польшчы, куды яны заўсёды могуць прыйсці, пагаварыць пра пытанні, якія іх хвалююць, атрымаць падтрымку, пакамунікаваць па-беларуску. Беларускі дом ладзіць цікавыя творчыя, навуковыя, культурныя сустрэчы, выставы, святкаванні. Гэта важна, бо мы хоць і жывем у Польшчы павінны памятаць адкуль мы.

Прысутны на прэзэнтацыі філёзаф Пётра Рудкоўскі зазначыў, што ўбачанае ім у Беларускім доме дае надзею.

Пётра Рудкоўскі: Маё сапраўднае знаёмства з Беларускім домам адбылося цяпер. Я ўбачыў тут вялізарны патэнцыял. Тутэйшая дзейнасць настолькі разгалінаваная, суды прыйшло столькі асобаў са сваімі крэатыўнымі ідэямі ды прапановамі. Гэта ўнушае добрую надзею.

Чытайце па тэме:  «У Беларусі захоўваецца патэнцыял для сацыяльнага выбуху»

На бліжэйшыя гады Беларускі дом паставіў перад сабой мэту – дапамагаць захоўваць повязь з бацькаўшчынай тым, хто быў вымушаны з’ехаць з краіны, а таксама набліжаць Беларусь да Эўрапейскага Звязу.

Юры Ліхтаровіч, Польскае Радыё


Recommend to friends
  • gplus
  • pinterest

Дадаць каментар

E-mail is already registered on the site. Please use the увайсці форма or увядзіце іншы.

You entered an incorrect username or password

На жаль, вы павінны ўвайсці ў сістэму.