У Міністэрстве транспарту і камунікацый Літвы пракамэнтавалі заяву міністра транспарту і камунікацый Беларусі Анатоля Сівака, што літоўская дзяржава датуе Віленскі аэрапорт, каб завабіць «бюджэтныя» авіякампаніі.

Пасажыры чакаюць пасадкі на рэйс Ryanair у Віленскім аэрапорце

 

Кіраўнік Беларусі Аляксандар Лукашэнка 24 красавіка ў сваім пасланні да народу і парлямэнту спытаўся: «Чаму нашым грамадзянам больш выгадна лётаць адкуль заўгодна — з Вільні, Кіева, Варшавы, але ня з Менску?».

У суседніх з Беларуссю краінах (у тым ліку ў Віленскім аэрапорце) працуе шэраг лоўкостэраў — авіякампаній, якія прапануюць палёты па мінімальных цэнах, але бяз большасці дадатковых паслугаў для пасажыраў, з вельмі абмежаванымі аб’ёмамі багажу, нярэдка ў нязручны час або ў далёкія ад папулярных гарадоў аэрапорты.

У Беларусь лоўкосты практычна ня лётаюць, няма і беларускай лоўкост-кампаніі — прычыны гэтага называюць самыя розныя.

Беларускі міністар: Літва датуе Віленскі аэрапорт з бюджэту

Адказваючы на пытанне ад Лукашэнкі, ​міністар транспарту і камунікацый Беларусі Анатоль Сівак патлумачыў у інтэрвію парталу Tut.by, што ў Літве «лётаюць лоўкост-кампаніі, а „Белавія“ гэты прынцып лоўкост-кампаній не прымяняе».

Паводле Сівака, у Вільні аэрапорт «прад’яўляе кампаніям часам мінімальныя выдаткі, а часам наагул яны датуюць гэты аэрапорт».

«Мы ж не датуем сёння ніводным рублём з бюджэту наш аэрапорт», — сказаў Анатоль Сівак.

У кампаніі «Белавія» карэспандэнту Свабоды адмовіліся камэнтаваць сытуацыю, бо «міністар ужо ўсё сказаў».

Самалёт «Белавія»

 

«Эўрапейскія рэглямэнты не прадугледжваюць датавання аэрапортаў»

Якая сытуацыя з фінансаваннем аэрапортаў у Літве, Свабодзе сказаў дырэктар дэпартамэнту палітыкі ў сфэры дарожнага транспарту і грамадзянскай авіяцыі літоўскага Міністэрства транспарту і камунікацый Уладыслаў Кандратовіч.

«У нас дзейнічаюць эўрапейскія рэглямэнты і дырэктывы, якія не прадугледжваюць датавання аэрапортаў. Наогул у нас няма сваёй авіяцыі, мы ня маем нацыянальнага перавозчыка, нам няма каго датаваць», — сказаў літоўскі чыноўнік.

Паводле дырэктара дэпартамэнту, адносна аэрапортаў у Літве «даволі строга ўсё апісана, дзе дзяржава можа дапамагаць».

«Гэта пабудова і падтрыманне ўзлётна-пасадачнай паласы, забеспячэньне сыстэмы бяспекі. І больш ніякіх падтрымак няма. То бок свой бюджэт аэрапорты пераважна фармуюць з палётаў», — сказаў Уладыслаў Кандратовіч.

У Літве працуюць папулярныя ў свеце лоўкосты Wizz Air і Ryanair, паслугамі якіх карыстаюцца і многія грамадзяне Беларусі.

Літоўскія аэрапорты: прыбытак і пасажырапаток

У дзяржаўнай кампаніі Lietuvos oro uostai, якая аб’ядноўвае аэрапорты ў Вільні, Коўне і Паланзе, карэспандэнту Свабоды таксама пацьвердзілі, што датаваць аэрапорты з бюджэту немагчыма паводле закону.

У мінулым годзе пасажырапаток трох літоўскіх аэрапортаў склаў каля 5,2 мільёна пасажыраў. Сёлета за першы квартал адзначаецца рост колькасці пасажыраў параўнальна з такім жа мінулагоднім пэрыядам.

У 2016 годзе Lietuvos oro uostai​ выплаціла дзяржаве звыш 1,7 мільёна эўра, сума дывідэндаў склала на 70% больш, чым за 2015 год.

Для параўнання, Нацыянальны аэрапорт «Менск» за 2017 год перавёз больш за 4 мільёны пасажыраў, што на 20% перавышае паказчык 2016 году. Пасажырапаток «Белавіі» ўпершыню ў гісторыі авіякампаніі дасягнуў трох мільёнаў чалавек.

Чаму лоўкосты ня лётаюць у Беларусь?

Апошняя спроба наладзіць палёты бюджэтных авіякампаній у Беларусь належыць расейскаму лоўкосту «Победа». Аднак, паводле гендырэктара «Белавіі» Анатоля Гусарава, «Победа» адмовілася ад рэйсаў у Менск праз тарыфы на абслугоўванне ў Нацыянальным аэрапорце «Менск».

У расейскім жа авіяперавозчыку «лічаць, што расейскія авіякампаніі не павінны абслугоўвацца ў Менску па тарыфах нерэзыдэнтаў».

Гусараў мяркуе, што «Победа» магла прэтэндаваць на «нейкае асаблівае стаўленне» ў вызначэнні тарыфаў, але «не знайшла ўзаемаразумення». Сама «Победа» сцьвярджае, што чакае «роўных умоваў» для беларускіх і расейскіх кампаній — і пакуль іх не атрымае, не адновіць палёты.

Цэнавыя спрэчкі цягнуцца прынамсі з канца 2015 году.

Маршрут Менск — Масква — найбольш запатрабаваны ў зносінах паміж Беларуссю і Расеяй. Квіток у адзін бок на рэйсы «Аэрафлёту» каштуе ў сярэднім 60 эўра, «Белавіі» — ад 50 эўра. Першапачаткова «Победа» гатовая была вазіць у Маскву і назад фактычна за траціну ад згаданых сумаў — да 20 эўра.

Алесь Дашчынскі, Радыё Свабода

Навіны ад Belprauda.org у Telegram. Падпісвайцеся на наш канал https://t.me/belprauda.

Recommend to friends
  • gplus
  • pinterest
Поддержать проект: