Звесткі пра некаторыя выпадкі самагубства сярод вайскоўцаў трапляюць у СМІ, нягледзячы на закрытасць тэмы. Пры гэтым вайсковая частка ў Печах фігуруе ў зводках рэгулярна і нашмат часцей, чым іншыя.

3 кастрычніка 2017 года, Аляксандр Коржыч

На дадзены момант гэта апошні вядомы выпадак самагубства ў беларускім войску. 21-гадовага Коржыча нібыта знайшлі павешаным у памяшканні вайсковай часткі ў барысаўскіх Печах, дзе ён праходзіў тэрміновую вайсковую службу. Пры гэтым родныя Коржыча ў афіцыйную версію аб самагубстве верыць адмаўляюцца. Родныя вайскоўца перадалі ў рэдакцыю Свабоды пасмяротныя фатаздымкі, на якіх выразна відаць гематомы. Таксама яны кажуць, што ў Аляксандра Коржыча падчас службы ў войску неаднаразова адбіралі грошы, яму пагражалі расправай.

31 сакавіка 2017 года, Арцём Басцюк

Арцём служыў у вайсковай частцы № 25849 Барысава. За дзень да гібелі Басцюк патэлефанаваў бацькам, папрасіў у іх прабачэння і развітаўся. Усхваляваныя родныя адразу ж звязаліся з кіраўніцтвам часткі і папрасілі разабрацца ў сітуацыі. Там іх запэўнілі, што з сынам будзе ўсё ў парадку.

За тры тыдні да смерці сына Басцюкі прыяжджалі ў частку на сустрэчу з яе кіраўніцтвам. Тады Арцём Басцюк у прысутнасці бацькоў расказваў камандаванню пра выпадкі дзедаўшчыны, называў імёны і прозвішчы тых, хто чыніў на яго ціск.

Пасля смерці Басцюка Следчы камітэт пачаў праверку. Вынікі расследавання пакуль не агучваюцца, да суду справа яшчэ не дайшла

10 лютага 2017 года, Павел Старанкоў

Парэшткі 19-гадовага служачага тэрміновай службы з часткі № 44540 знайшлі праз некалькі месяцаў пасля яго знікнення з месца службы. Старанкоў сышоў з часткі яшчэ ў лістападзе 2016 года і значыўся ў вышуку. Мінабароны і Следчы камітэт у якасці асноўнай прычыны смерці Старанкова назвалі суіцыд. Праводзілася праверка, апытвалі ягоных таварышаў па службе і родных. Вынікі праверкі не публікаваліся.

19 студзеня 2017 года, Печы, смерць на пляцы

Трагедыя здарылася на тэрыторыі 72-га навучальнага цэнтра ў Печах. Па інфармацыі, якая трапіла ў СМІ, вайсковец паветрана-дэсантных войскаў памёр падчас практыкаванняў на пляцы. Прэс-служба Мінабароны пацвердзіла інфармацыю пра здарэнне, аднак падрабязнасцяў не раскрыла. Вядома толькі, што яно «не звязанае з праходжаннем вайсковай службы».

24 жніўня 2016 года, вайсковы палігон пад Барысавам

Пра гэты выпадак інфармацыі няшмат. Вядома, што здарэнне адбылося на 226-м палігоне «Барысаўскі» падчас вучэбных стрэльбаў. Вайсковец тэрміновай службы атрымаў баявыя патроны і накіраваўся на агнявы рубеж. Аднак, не даходзячы да яго, прыклаў дула да галавы і выстраліў усе тры патроны.

Нябожчыку было 23 гады, а да завяршэння тэрміну службы заставалася два месяцы. Інфармацыю пра здарэнне пацвердзілі ў Мінабароны, аднак падрабязнасцяў не раскрылі, спасылаючыся на «этычныя прычыны». Следчы камітэт праводзіў праверку па факце гібелі вайскоўца, яе вынікі не публікаваліся.

22 сакавіка 2015 года, Печы

Паведамленне прэс-службы Міністэрства абароны: «21 сакавіка 2015 года ў 72 аб’яднаным навучальным цэнтры меў месца факт самагубства вайскоўца тэрміновай службы. Для ўстанаўлення сапраўдных прычын таго, што здарылася, праводзяцца следчыя дзеянні. Міністэрства абароны выказвае спачуванне родным і блізкім ваеннаслужачага».

Падрабязнасці здарэння не раскрываліся.

13 красавіка 2005 года, Барысаў, Максім Кажэка

Кажэка загінуў у барысаўскіх Печах праз тры месяцы пасля прызыву ў войска. Ён быў адзіным сынам у бацькоў, у войска пайшоў адразу пасля школы. Перад самагубствам Максім Кажэка самавольна пакінуў частку, яго знайшлі на наступны дзень за 6 кіламетраў ад яе ў лесе. Вайсковец павесіўся на ўласным рамяні, у кішэні была развітальная запіска з просьбай «дараваць усё».

«Войска — складаная школа, праўдзівая праверка характэрных для асобы ўласцівасцяў, — гаварылася ў афіцыйным каментары Мінабароны з нагоды смерці Максіма Кажэкі. — Тут імгненна раскрываюцца ўсе эмацыйна-валявыя праблемы маладога чалавека, якія завуаляваныя размераным цывільным жыццём».

Мінабароны Беларусі вельмі неахвотна дзеліцца дадзенымі пра колькасць самагубстваў у беларускай арміі. У 2004 годзе тагачасны міністар абароны Леанід Мальцаў адзначаў, што за год у беларускай арміі ўчынілі самагубства 11 чалавек.

У артыкуле кіраўніка ўпраўлення інфармацыі галоўнага ўпраўлення ідэалягічнай працы Мінабароны палкоўніка Уладзіміра Макарава «Армія і дысцыпліна», размешчаным на сайце Мінабароны ў 2009 годзе, прыводзяцца значна меншыя лічбы.

«У беларускай арміі аналагічны паказчык (колькасць самагубстваў) у мінулым годзе складаў каля 1 на 10 тысяч чалавек, гэта значыць у тры разы менш, чым па рэспубліцы, і ў чатыры разы менш, чым ва Узброеных Сілах у сярэдзіне 90-х гадоў», — гаварылася ў ім. Гэта значыць — каля 5 выпадкаў у год.

У тым жа артыкуле палкоўніка Макарава падаецца статыстыка самагубстваў у беларускім войску сярэдзіны 90-х. У 1995 годзе ва Узброеных сілах Беларусі было 42 самагубствы. У наступныя гады, як піша Макараў, колькасць трагічных здарэнняў пачала зніжацца:

«Захады, зробленыя ў 1995–1996 гадах дзеля прафілактыкі злачынстваў і здарэнняў, спрыялі скарачэнню колькасці толькі самагубстваў больш як у два разы ўжо ў 1996 годзе».

Сярод гэтых захадаў называюцца стварэнне лабараторыі сацыяльна-псіхалагічных даследаванняў а таксама ўвядзенне пасады вайсковых псіхолагаў.

Радыё Свабода

Навіны ад Belprauda.org у Telegram. Падпісвайцеся на наш канал https://t.me/belprauda.

Recommend to friends
  • gplus
  • pinterest
Поддержать проект: