Як паведаміла маці Ігара Барбашынскага, які загінуў у Жодзінскім следчым ізалятары, Жодзінскі следчы камітэт па гэтым факце ўзбудзіў крымінальную справу супраць медыкаў, якія абвінавачваюцца ў неасцярожнасці.

Ігар Барбашынскі. Фота «Новы час»

Ігар Барбашынскі. Фота «Новы час»

Галіна Шаравар 13 снежня 2016 года атрымала паштовае паведамленне пра ўзбуджэнне крымінальнай справы па факце неналежнага выканання прафесійных абавязкаў медыцынскімі работнікамі Жодзінскай папраўчай установы — турмы №8 і Жодзінскай гарадскай бальніцы.

Адпаведная пастанова была прынята следчым камітэтам 7 снежня 2016 года.

Медыкі абвінавачваюцца па артыкуле 162 частцы 2 Крымінальнага кодэксу — неналежнае выкананне медыцынскімі работнікамі прафесійных абавязкаў, якое прывяло па неасцярожнасці да смерці пацыента.

Больш падрабязна з матэрыяламі справы жанчына зможа азнаёміцца непасрэдна ў аддзеле Следчага камітэта горада Жодзіна.

Галіна Паўлаўна, якая ў чаканні адказу ад следчых ўжо некалькі месяцаў жыве ў страшэнным напружанні, не зусім згодна з высновамі следчых.

— Я згодная з тым, што дактары не выканалі сваіх прафесійных абавязкаў, але не разумею такой фармулёўкі, як «смерць пацыента па неасцярожнасці» ў дачыненні да медыкаў-прафесіяналаў, — гаворыць маці. — Іхні абавязак лячыць пацыентаў, а не дапамагаць ім па неасцярожнасці адпраўляцца на той свет. У мяне шмат пытанняў да дактароў.

Дактары не паставілі ніякага дыягназу, але нешта калолі і нешта лячылі.

Як сведчаць дакументы, па выніках абследавання медыкі выставілі Ігару дыягназ — энцэфаліт неўдакладненай этыялогіі, і яго стан быў ацэнены як «сярэдняй цяжкасці». І вось у такім «сярэднім» стане 19 верасня ў 17.00 яго адправілі на выздараўленне ў турму, дзе каля 6 гадзін раніцы 20 верасня яго ўжо знайшлі мёртвым.

Чытайце па тэме:  Смерць за кратамі: вінаватых зноў няма? (відэа)

Па словах маці, яна кожны раз «упадае ў ступар», перачытваючы розныя жахлівыя падрабязнасці. І ёй вельмі хочацца, каб хтосьці адказаў на яе пытанні:

— Чаму пасля слоў слуцкага міліцыянта Ярашэвіча «Товарищ майор, поехали!» з такой лёгкасцю закруціўся гэты клубок смерці, які канчаткова даблыталі жодзінскія кантралёры і медыкі? Чаму медыкі, калі бачылі, што сын памірае, не вызвалі маці? Хто даў ім такія ўказанні? — пытае маці. — Ён яшчэ не быў асуджаны, а ўжо перастаў быць чалавекам?

Таксама Галіну Шаравар насцярожыла адсутнасць згадкі пра 17 адмысловых цялесных пашкоджанняў у сына за некалькі дзён да смерці і рубцах на галаве.

— Чаму ані словам не згадваецца аб збіцці? Адкуль з’явіліся гематомы і сінякі, якія зафіксаваны судова-медычнай экспертызай? Ці гэта медыкі білі сына?

Трэба самім вывучаць матэрыялы справы з дапамогай спецыялістаў. Спадзяюся на дапамогу праваабаронцаў, — дзеліцца сваімі перажываннямі маці.

Зінаіда Цімошак, Новы час

Навіны ад Belprauda.org у Telegram. Падпісвайцеся на наш канал https://t.me/belprauda.

Recommend to friends
  • gplus
  • pinterest
Поддержать проект: